Claudine at pamilya Yan ginunita ang pagkamatay ni Rico

HATAWAN
ni Ed de Leon

AFTER 20 years ha, kasama na ngayon si Claudine Barretto ng pamilya at ng kanilang  fans sa paggunita sa kamatayan ng actor at dati niyang boyfriend na si Rico Yan. Nagkita-kita sila sa memorial park na kinalilibingan ni Rico at doon ay nagkaroon din ng maikling program na binigyan sila ng pagkakataong magsalita ng tungkol sa memories nila sa yumaong actor.

Natatandaan namin, Biyernes Santo iyon mismo nang bulagain ang lahat ng balita na si Rico daw ay binangungot at namatay sa kanyang pagkakatulog. Nang ginigising siya ay hindi na nagising, at sinasabing iba na rin daw ang kulay. Isinugod pa siya sa ospital sa Palawan at pagkaraan ay idineklara ngang patay na. Mabilis dinala si Rico sa Maynila para sa autopsy na ginawa ng PNP Crime lab at lumabas na nagkaroon nga ng problema ang kanyang pancreas.

Marami ang hindi makapaniwala, kabilang na ang broadcast journalist na si Arnold Clavio na nagsabing kasama pa nila si Rico na nag-karaoke the night before. Pero ganoon talaga ang buhay. Walang makapagsasabi kung hanggang kailan lang talaga iyan.