Aga Muhlach, mababaw ang luha

PABONGGAHAN
ni Glen P. Sibonga

NADISKUBRE ng Programming Consultant ng NET 25 na si Ms. Wilma Galvante na mababaw pala ang luha ni Aga Muhlach.

“Ito palang si Aga ay mababaw ang luha. First episode pa lang ng ‘Bida Kayo Kay Aga’ eh umiyak na agad siya,” sabi ni Ms. Wilma.

Hindi nga maiwasang maging emosyonal ni Aga dahil sa nakaaantig at nakabibilib na mga istorya ng mga taong nakakausap at naiinterview niya sa bagong show na iho-host niya sa NET 25, ang Bida Kayo Kay Aga, isang feel-good reality show, na ipalalabas na sa March 26, Sabado, 7:00 p.m.. 

Bibida sa show ang mga daddy na katulad ni Aga ay achiever din sa life sa pinasok nilang larangan. Gayundin ang mga boss ng sarili  nilang negosyo na napalago nila mula sa maliit na pinagsimulan. Tampok din ang mga taong gumawa ng “random acts of kindness,” o ang mga taong nakahandang tumulong at magmalasakit nang walang hinihinging kapalit.

“Nakaka-touch lang na may mga taong handang tumulong at hindi humihingi ng kapalit. Marami tayong mga bida na dapat saluduhan. Nakaka-touch ang mga istorya nila na through ‘Bida Kayo Kay Aga’ ay maibahagi ko sa mga manonood. Very inspiring talaga. Hindi ko mapigilang mapaluha sa kasiyahan at paghanga. Thanks to NET 25 for allowing me to do this show,” ani Aga.

Mapapanood ang Bida Kayo Kay Aga sa Net25 TV, Net25 Facebook page at Youtube

channel tuwing Sabado, 7:00 p.m., simula sa March 26.