Ariel Lim ‘di korap, adbokasiya ang makatulong

ni JOHN FONTANILLA

HUMARAP sa entetainment press ang kapatid ng Pinay Japan Superstar na si Marlene Dela Peña na tumatakbong Senator ngayong darating na 2022 Local Election at dating driver na si Ariel Lim.

Kuwento ni Lim, 100% ang suporta ni Marlene sa kanya. Isa lang ang paalala nito sa kanya sakaling maluklok na senador, ‘wag mangurakot.

Mula sa mahirap na pamilya si Lim at hindi niya ikinahihiya na minsan sa buhay niya ay  naging driver siya, kaya naman suportado siya ng mga tricycle driver sa buong Pilipinas. At dahil sa kanyang pagsusumikap ay gumanda ang kanyang buhay at ngayon nga ay tumatakbong senador ng bansa.

Tumakbo sa pagka-senador si Lim dahil sa nakikitang sandamakmak na problema na kinakaharap ng bansa. Nais niyang makatulong sa abot ng kanyang makakaya.

Aminado rin ang senatorial bet na malaking challenge sa kanya ang pagtakbo bilang independent candidate, lalo’t wala itong masyadong makinarya tulad ng mga sikat at datihan ng mga tumatakbong senador.  Pero marami naman ang sumuporta sa kanya katulad ng reigning Mrs Universe Philippines Australia, LGBTQ, Samahan ng mga tricycle drivers sa buong Pilipinas, Filipino Community sa Australia at marami pang iba.

Naniniwala ito na hindi dahil sa sikat o sa makinarya kaya iboboto ng tao, kung hindi  dahil alam nilang may magagawa para sa magandang pagbabago ng bansa at handang maglingkod ng buong puso.

Napakaganda ng adbokasiya ni Sir Ariel para sa mga driver, commuters, at sa sambayanang Filipino kung papalarin siyang manalo bilang senador.