Walk of Fame ni Kuya Germs palalawigin pa ni Defensor

MATABIL
ni John Fontanilla

MAGKASABAY na nakatsikahan ng ilang entertainment press ang tumatakbong Mayor  ng Quezon City na si Partylist Rep. Mike Defensor at Congresswoman ng District  2  ng Quezon City at dating aktress na si Precious Hipolito- Castillo.

Ibinahagi ni Cong. Mike ang malaking pagbabago sa Quezon City kapag siya ang nahalal na mayor sa darating na May 9 Local election. At isa na rito ang paggawa ng Quezon City bilang Entertainment Capital of the Philippines.

Itutuloy nito ang matagal nang iminumungkahi ng nasirang Mastershowman Kuya  German Moreno na maging City of Stars ang Quezon City at magkaroon dito ng Museum at Walk of Fame katulad ng nasa Eastwood.

Ilan pa sa mga proyekto sa Quezon City na gagawin ni Cong. Mike ay ang pagpapa-ilaw sa mga madidilim na major and inner streets, benepisyo sa mga senior citizens, at sa mga mag-aaral atbp..

Sinabi naman ni Cong. Precious na napakaraming magagandang proyekto sa Quezon City ang gustong gawin ni Cong. Mike na talaga namang malaking tulong sa mamamayan ng QC kapag nanalo itong mayor. Bukod pa sa likas ang pagiging matulungin ni Defensor sa tao, mabait, at napakasipag pa.