Tom ayaw mag-asal kalye

HATAWAN
ni Ed de Leon

NANANATILING tahimik at nasa ayos ang mga aksiyon at salita ni Tom Rodriguez tungkol sa mga umuugong na controversy nila ng asawang si Carla Abellana.

“Ang sinasabi ng mother ko, magtira ka naman para sa sarili mo. Hindi iyong lahat ay ilalabas mo na sa mga tao. We have privacy pa naman at may mga bagay na mas mabuti kung pananatilihin naming sa amin na lang,” sabi ni Tom.

Diyan makikita mo kung ano ang nakalakihan niyang kaugalian at kapaligiran. Hindi asal kalye. At naniniwala naman kaming tama si Tom. May karapatan din maging ang mga artista na manatiling tahimik sa mga issue, lalo na kung personal at naniniwala siyang iyon ang mas makabubuti para sa kanya. Walang may karapatang puwersahin

siyang magsalita. Hindi tamang katuwiran iyong dahil artista sila at “public property” ay kailangan na nilang ilabas ang lahat.

Ang artista ay public property lamang sa mga bagay na may kinalaman sa kanilang propesyon, pero sa personal, wala nang pakialam sa kanila ang publiko.