Anjo at Analyn kapwa na-pressure sa First Lady

RATED R
ni Rommel Gonzales

MULA sa matagumpay na pag-ere sa GMA ng First Yaya noong 2021, ngayong 2022 ay tuloy ang kuwento nina Melody Acosta-Reyes bilang First Lady (ginagampanan ni Sanya Lopez) at mister niyang Pangulo ng Pilipinas na si Glenn Acosta played by Gabby Concepcion.

Siyempre, kasama rin nila sa panibagong kabanata ng kanilang buhay sa First Lady ang ibang mga karakter na nagmula rin sa First Yaya tulad nina Analyn Barro bilang Gemrose Reyes-Garcia (kapatid ni Melody) at si Jasper Garcia (asawa ni Gemrose at ginagampanan ni Anjo Damiles).

Kaya naman tinanong namin ang mga nabanggit kung may pressure ba silang nadarama sa First Lady na mapantayan (o malampasan) ang tagumpay ng First Yaya?

“For me po, the pressure is there but I’m a bit confident. Ang laki po ng tiwala ko kay direk LA, kay San [Sanya], kay kuya Gabby, at sa lahat ng actors ng ‘First Lady’ so, confident po ako na masu-sustain at malalagpasan pa namin ‘yung mga expectation ng mga audience. And I’m so sure na mas lalong pinagaganda ng creatives ‘yung istorya at mga eksena kaya panatag po ako sa ‘First Lady’ and excited din,” ang nakangiting pahayag ni Analyn.

Kinakabahan naman daw si Anjo.

“Kasi panibagong taping na naman ito, pero just like Analyn po may kompiyansa ako kila kuya Gabby, kila Sanya, and of course sa buong production team, sa mga direktor namin, sa writers, kasi iba, iba ‘yung takbo ng isip nila ngayon.

“Mas napaganda nila ‘yung show, and alam ko kung maganda ang ‘First Yaya,’ mas maganda ang ‘First Lady.’ Maraming nadagdag na bagong karakter so, nakatutuwang gawin ‘to.”

Ang First Lady ay idinidirehe nina LA Madridejos at Rechie del Carmen.