Tom nasaksihan ang galit ni Odette, humingi ng tulong at dasal

RATED R
ni Rommel Gonzales

ISA ang Kapuso leading man at The World Between Us male lead actor na si Tom Rodriguez sa nakaranas ng pananalasa ng bagyong Odette!

Nasa probinsiya si Tom nang sagasaan ni Odette ang mga lugar ng Visayas, Mindanao at mga karatig probinsiya.

Sa video posted ni Tom sa kanyang Instagram account, makikita si Tom at iba pang mga bisita na patungo sa ballroom ng hotel na naroon sila nang inabutan ng napakalakas na bagyo.

Hindi na sinabi ni Tom ang eksaktong lugar o probinsiya kung saan siya naroroon.

Ayon pa kay Tom na nagsasalita sa video, pinayuhan sila na magpunta sa ballroom ng hotel para sa kanilang kaligtasan.

Kasalukuyang may ginaganap na kasalan sa naturang ballroom.

Ayon pa sa caption ni Tom sa kanyang IG video…”A bit of a panic for everyone here. Stay safe and vigilant everyone. Malalampasan din natin to.”

Ipinakita rin ni Tom kung paano nanalasa sa kinaroroonan nila si Odette; may mga puno na nabunot mula sa lupa,  mga sasakyan na tinangay ng malakas na hangin mula sa kinaroroonan ng mga ito, at mga nagibang pader ng hotel.

Hindi na nabanggit ni Tom kung kasama niya ang misis niyang si Carla Abellana sa kinaroroonan niya noong nakatatakot na mga sandaling iyon.

Walong landfalls ang ginawa ng bagyong Odette na nagdulot ng matinding pagbaha at kalamidad; sa Siargao Island, Surigao del Norte, Cagdinao, Dinagat Islands, Liloan, Southern Leyte, Padre Burgos, Southern Leyte, President Carlos P. Garcia, Bohol, Bien Unido, Bohol, Carcar, Cebu, at La Libertan, Negros Oriental.