Angel Locsin nagbigay ng P2-M sa mga nasalanta ng bagyong Odette

SHOWBIZ KONEK
ni Maricris Valdez Nicasio

IBINULGAR ni Kris Aquino sa pamamagitan ng social media kung magkano ang ipinadalang tulong ni Angel Locsin sa mga nasalanta ng bagyong Odette na ipinadaan sa relief operation ni VP Leni Robredo.

Ani Kris, ”Nag-donate po si Angel Locsin ng P2-M kay Leni para po ipantulong sa lahat po ng nasalanta.” 

Dahil sa laki ng ibinigay ni Angel, sinabi ni Kris na, ”Kaya noong nalaman ko po ‘yun sinabi ko, kailangan higitan ko po ‘yung ginawa ni Angel.”

Hindi naman ito ang unang beses na nagbigay ng tulong si Angel sa mga kababayan natin. Noon pa man basta may sakuna, bagyo o kahit nitong pandemya, aktibo si Angel sa pagtulong.

Samantala, nasaHimamaylan  City, Negros Occidental noong isang araw si Kris kasama ang fiance na si dating DILG Sec Mel Senen Sarmiento para mamigay ng mga relief pack sa mga apektadong pamilya. Kasama rin nila roon si VP Robredo.

Marami naman ang nagpaabot ng papuri at pasasalamat kay Angel dahil sa walang sawang pagtulong nito sa mga nangangailangan.