Kaguwapuhan ni Jak binasag ng netizen: Retokado raw kasi

HATAWAN
ni Ed de Leon

KUNG titingnan mo sa ngayon si Jak Roberto, hindi lang naman maganda ang kanyang katawan, pogi naman siya kaya marami rin siyang fans. May nagsasabi ngang sa ngayon, isa siya sa best looking male stars, pero ewan ba kung bakit may ibang nagpipilit pa na hindi naman daw pogi si Jak. Retokado lang daw ang mukha niyon.

Ewan kung sino ang may galit kay Jak, hinanap pa ang kanyang mga picture noong nagsisimula pa lamang siya at sumasali sa mga male personality contest, bago siya nakasali sa Walang Tulugan, para patunayan lang na hindi siya totoong pogi at nagpa-retoke lamang.

Eh ano ba kung nagpa-retoke? Maganda naman ang kinalabasan ng retoke sa mukha niya kung sino mang doctor ang gumawa niyon, at ang
mahalaga kung ano ang itsura niya ngayon. Palagay namin hindi naman papansinin ng mga fan ang mga picture niya bago nagpa-retoke.