Doktora sa Abra niratrat patay sa atake sa puso

SUGATAN ang isang doktor, ngunit binawian ng buhay kalaunan nang atakehin sa puso, matapos pagbabarilin ng hindi kilalang suspek sa kanyang bahay sa bayan ng Pilar, lalawigan ng Abra, nitong Sabado ng gabi, 18 Setyembre.

Kinilala ang biktimang si Amor Trina Dait, 53 anyos, isang doktor at natalong kandidato sa pagka-alkalde noong Mayo 2019.

Tinamaan si Dait ng bala sa kanyang leeg at dinala sa Abra Provincial Hospital kung saan siya namatay dahil sa atake sa puso habang nilalapatan ng lunas.

Ayon sa pulisya, kasalukuyang nakaupo si Dait at ang kaniyang asawa sa balkonahe ng kanilang bahay sa Brgy. Poblacion, sa naturang bayan, nang dumating ang suspek sakay ng motorsiklo dakong 7:30 pm, saka limang beses nagpaputok ng rifle.

Narekober ng mga imbestigador ang limang basyo ng bala ng M16 rifle sa pinangyarihan ng krimen.

Samantala, naniniwala si Abra Congressman JB Bernos, may kinalaman sa politika ang pamamaril dahil kilalang lider ng oposisyon sa naturang bayan si Dait.