HATAW! D'yaryo ng Bayan hatawtabloid.com
PATAY ang isang 20-anyos mister habang sugatan ang kanyang maybahay nang manghimasok sa kanilang pagtatalo ang kapatid ng babae sa bayan ng Tanudan, lalawigan ng Kalinga, nitong Linggo, 12 Setyembre.
Ayon sa mga imbestigador, binaril at napatay ng suspek na kinilalang si Milandro Maslang, ang kanyang bayaw na si Joey Gobyang, habang nakikipagtalo sa misis na si Carmen, 33 anyos, sa kanilang bahay sa Brgy. Upper Lubo, sa naturang bayan.
Nabatid na umawat si Milandro sa pagtatalo ng mag-asawa ngunit itinulak siya ng bayaw na si Joey, dahilan upang barilin ng suspek nang tatlong beses ang biktima, na agad namatay.
Nananatiling walang malay sa pagamutan ang asawa ni Gobyang na si Carmen, kapatid ng suspek.
Samantala, isinuko ni Milandro sa pulisya ang kanyang sarili at ang kalibre .45 baril, mga bala, at magasin.
