Martin sa pagganap na Prince Zardoz — masarap sa pakiramdam

Rated R
ni Rommel Gonzales

UNANG beses na nagkontrabida sa isang teleserye si Martin del Rosario sa The Gift na umere noong September 2019 hanggang February 2020.

“Usually grey eh, grey lang, parang third party na nang-aagaw ng… pero ‘yun kontrabida talaga.”

Challenging iyon para kay Martin, pero enjoy siya sa pagkokontrabida.

“Pero more than challenging mas nasasarapan ako roon sa pakiramdam. 

“Kasi mas malaya akong gumalaw, ang dami kong puwedeng gawin, kasi noon isa ito sa mga dream kong gawin eh, maging kontrabida.

“Na parang feeling ko na, ‘Ah, hindi ko maaabot ito!’

“Kasi parang ang bait ng mukha ko, mukha akong laging parang maamo ‘yung mukha.

“Pero alam ko naman sa sarili ko na, ‘Ah, kaya ko naman ito!’”

At ang latest ngayong 2021, naka-lock in na si Martin sa taping ng pasabog na programa ng GMA, ang Voltes V na gaganap siya na main contrabida, si Prince Zardos.

Pero bago iyon, mapapanood muna si Martin sa fresh episode ng Magpakailanma sa GMA sa Sabado, July 17.

Tunghayan natin sa Magpakailanman ang episode na Asawa at kabit sa isang bubong. Kasama ni Martin sina Katrina Halili, Kris Bernal, at Ollie Espino. Ito ay idinirehe ni Rechie Del Carmen, mula sa pananaliksik ni Karen P. Lustica, at panulat ni Loi Argel Nova.

Lahat ng mag-asawa ay nagnanais ng isang masaya at payapang pagsasama. Pero paano kung pagsamahin ni mister sa iisang bubong ang kanyang asawa at kabit?!

Sa Sabado, panoorin ang totoo at buong kuwento nina Lea, Karlo, at Marites. Ang dalawang babaeng pinagsama sa iisang bahay ng lalaking parehas nilang mahal.