HATAW! D'yaryo ng Bayan hatawtabloid.com
NAKILALA ang bagong Kapuso actor na si Royce Cabrera sa kanyang matatapang na pagganap sa indie films, pero ngayong Sabado, Pebrero 6, ay gagampanan naman niya ang mapangahas na karakter ni Makoy sa telebisyon.
Wala nang mahihiling pa si Makoy dahil mayroon silang masaganang buhay at masaya at buong pamilya. Pero ang lahat ng ito ay unti-unting guguho nang malulong sa bisyo ang kanyang mga magulang, makulong ang kanyang ina at malagay sa bingit ng kamatayan ang kanyang ama.
Sa murang edad ay kinailangan niyang pasanin ang kanyang mga magulang at kapatid, hanggang sa mapilitan siyang pasukin ang mundo ng pagiging sex worker.
Pero hanggang kailan niya kakayaning maging parausan ang kanyang katawan? Ano ang mga kapahamakang naghihintay sa kanya sa pinili niyang landas? Mabubuo pa kaya niya ang kanyang pamilya kahit na siya ay wasak na wasak na?
Tunghayan ang natatanging pagganap ni Royce sa Masahista For Hire episode ng Magpakailanman kasama sina Neil Ryan Sese, Khim De Leon, Rob Sy, at Alma Concepcion. Ito ay idinirehe ni Mark Dela Cruz, sinaliksik ni Karen Lustica, at isinulat ni Benson Logronio.
Rated R
ni Rommel Gonzales
