HATAW! D'yaryo ng Bayan hatawtabloid.com
HINDI natin alam kung humihina na tayo sa numero o mahina lang talaga tayong mag-estimate.
Hanggang ngayon po kasi hindi ko matuos-tuos sa isip ko kung ano ang kinahinatnan ng P275 bilyones na inilaan ng pambansang pamahalaan para siguruhing magtagumpay ang laban kontra COVID-19.
Kung hindi tayo nagkakamali, dito sa P275 bilyones kukunin ang pondo para sa ayudang manggagaling sa Social Amelioration Program (SAP) na magbibigay ng P5,000 to P8,000 sa mga kababayan nating higit na nangangailangan sa panahon ng pagpapatupad ng enhanced community quarantine (ECQ) hanggang abutin ng iba’t ibang antas ng CQs.
Pero, alam kaya ng Inter-Agency Task Force for the Management of Emerging Infectious Diseases (IATF-MEID) o ng National Task Force on COVID-19 (NTF COVID-19) na maraming senior citizens na soltera o soltero ang hindi nakatanggap ng ayudang SAP?
Ganoon din ang mga nagsosolong persons with disability (PWDs), mga solo parent na may trabaho pero nagpapaaral pa ng mga anak.
At iba pang nawalan ng trabaho dahil sa pagpapatupad ng ECQ.
Ang sabi ng mga kinauukulang awtoridad, hindi sila kasama sa SAP dahil prayoridad ‘yung mga kababayan nating mahigpit talagang nangangailangan.
Pero ang tanong, bakit maraming pedicab, tricycle, and jeepney drivers ang hindi nakatanggap ng ayuda mula sa SAP?!
Ang natanggap nila’y mga foodpacks mula sa local government units (LGUs).
At sa totoo lang, mas marami tayong narinig na walang natanggap kaysa nakatanggap. Halos bawat barangay, wala pa yatang 50 porsiyento sa mga nag-apply ang nabiyayaan ng ayudang SAP.
Mantakin naman ninyong, ini-lockdown pero kulang na kulang sa pangangailangan? At sa pagluluwag naman ng community quarantines, haharap naman sa pagbabayad ng natambak na bayarin sa tubig, koryente, upa sa bahay, auto loan, house loans, lending, 5/6, at kung ano-ano pang bayarin.
Magtataka pa ba tayo kung bakit maraming nag-aalborotong mamamayan?
Hindi komo wala nang community quarantines o lockdown ay balik na sa normal ang buhay o makababalik na sa trabaho at kikita na agad-agad.
Mismong mga awtoridad nga ang nagsasabi ‘di ba
— “tayo ay nahaharap sa new normal.”
Ngayon sa ilalim ng sinasabi ninyong new normal, ngayon po mas kailangan ng mamamayan ang ayuda, lalo na ‘yung mga tuluyang nawalan ng trabaho dahil hindi pa puwedeng buksan ang kanilang mga pinagtatrabahuang establisimiyento.
Ngayon ang panahong higit na kailangan ng mga mamamayan ang alalay ng pamahalaan.
Palagay naman po natin ‘e may natitira pa sa P275 bilyones.
Aba ‘e ilabas n’yo na!
ATTN: DEPED: TUITION
FEES SA PRIVATE
SCHOOLS WALA BANG
DISCOUNT?
ISA sa concern ngayon ng mga magulang na nagpapaaral ng mga anak sa pribadong paaralan ‘e ‘yung hindi nabawasan ang tuition fees, bagkus ay tumaas pa nga.
‘Yan ay kahit online classes o blended learning na ang ipatutupad ng Department of Education (DepEd) ngayong Academic Year 2020-2021.
Lahat ng mga magulang ngayon ay naka-focus kung paano isasaayos ang study station ng kanilang mga anak para maging conducive sa kanilang pag-aaral.
Kaya ibig sabihin gagastos sila lalo kung wala pang study room ang kanilang anak o mga anak.
Ibig sabihin din, hindi na papasok ang kanilang mga anak sa eskuwela at ang airconditioned classrooms ay hindi magagamit araw-araw kaya medyo makatitipid sa koryente ang mga eskuwelahan. Ganoon din ang ibang school facilities, tiyak na hindi magagamit maliban siguro kapag lumuwag-luwag ang panahon at/o maresolba nang mas maaga kung paanong maglalaho itong coronavirus.
Sa kabila niyan, nanatili ang tanong ng mga magulang, hindi ba mababawasan ang tuition fees ng kanilang mga anak gayong hindi naman sila gagamit ng school facilities?!
Sa halip, mas tataas ang konsumo nila ng koryente sa bahay dahil buong araw na nandoon ang mga anak nilang nag-aaral.
Palagay natin ‘e kailangan itong pag-aralan ng DepEd at ng private schools administrators para naman mapagaan din ang dalahin ng mga magulang.
Puwede po bang pag-aralan ninyo ‘yan kaysa naman lumiit ang enrolment ninyo kapag nagdesisyon ang mga magulang na huwag na munang i-enrol ang kanilang mga anak?!
Bakit hindi ninyo subukan, DepEd and private schools administrators… please?
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap
