Coco, inuulan ng black propaganda

EWAN kung matatawag na nga rin ba iyong “black propaganda.” Marami kaming nakikita ngayong kopya ng video ni Coco Martin, habang gumagawa ng pahayag laban sa pagpapasara ng ABS-CBN, pero ang mga iyon ay medyo binago dahil side by side, sa isang split screen ay ipinakikita naman ang mga sex scene na ginawa ni Coco noong araw sa mga gay indie film na kanyang ginawa.

Isang kakilala namin na talagang fan yata ni Coco noong araw, kahit noong panahong gumagawa pa nga siya ng gay indies bago naging si Cardo Dalisay, ang nagsabi sa amin na ang mga bold clip ay galing sa dalawang magkaibang pelikula. Sinasabi nga nila, tatlo lang naman ang mga pelikulang bold na iyon na nagawa ni Coco, at ewan kung pinagsisisihan na rin niya ngayon na gumawa pa siya ng ganoong pelikula na binayaran lang naman siya ng barya.

Minsan nangyayari talaga ang ganyan. May mga pelikulang nagagawa ang isang baguhang artista sa paniwalang doon siya sisikat, pero pagdating ng araw ay ginagamit naman ng mga kalaban nila para siraan sila. Unfair naman para kay Coco ang nangyayari. Nagpahayag lang siya ng kanyang saloobin tungkol sa kanyang network, hindi naman dapat na ipamumukha sa kanya ang mga pelikulang nagawa niya noong panahong nagsisimula pa lamang siya.

Hindi naman masasabing hindi siya mahusay na actor dahil sa mga pelikulang iyon. Hindi rin naman masasabing nasira ang kanyang kredibilidad at hindi siya dapat paniwalaan dahil lamang sa mga nagawa niyang mga gay indie. Pero bakit nga ba pinipilit ng mga nagagalit sa kanya na ilabas iyon sa social media side by side sa kanyang pahayag tungkol sa kanyang network? Hindi rin naman ang kanyang network ang gumawa ng mga pelikulang iyon, kundi mga independent companies na wala na rin ngayon.

HATAWAN
ni Ed de Leon