HATAW! D'yaryo ng Bayan hatawtabloid.com
UNANG pagtatambal nina Jasmine Curtis at Ruru Madrid ang romantic-drama movie na Cara X Jagger ng APT Entertainment at Cignal TV.
Sa direksiyon ni Ice Idanan at sa orihinal na istorya ni Acy Ramos, ang Cara X Jagger ay isang ‘di malilimutang love story na nakasentro kina Cara (Jasmine) at Jagger (Ruru), na isang dating magkasintahan na haharap sa matinding paghamon at komplikasyon na susubok sa kanilang pag-iibigan.
Pilit na kinakalimutan ni Cara ang isang masakit na pangyayaring sumira sa relasyon nila ni Jagger. Habang si Jagger naman ay pilit na inaalala ang kanyang nakaraan matapos mawala ang kanyang alalala dahil sa isang aksidente.
Isang award-winning na aktres at isang celebrity influencers ngayon na milyon ang followers sa social media, kilala internationally si Jasmine dahil sa kanyang critically acclaimed na pagganap sa indie hit na Transit. Mula nang nagsimula sa showbiz noong 2010, napanood si Jasmine sa ilang mga independent films gaya ng Dementia, Bonifacio: Ang Unang Pangulo Baka Bukas, at Maledicto.
Sa kasalukuyan, nasa Kapuso Network ang aktres at lumabas sa matagumpay na serye ng Siyete na Pamilya Roces at bahagi ng bigateng ensemble cast ng hinihintay ng lahat na Descendants Of The Sun.
Nabanggit ng younger sister ni Anne Curtis ang ‘di malilimutang experience sa shooting ng kanilang pelikula ni Ruru. “It’s a very different kind of love story,” aniya. Saad ni Jasmine, “We have worked so hard to make Cara X Jagger an unforgettable movie. I am humbled and inspired by our team at ready na ako sa pag-promote ng pelikulang ito. Sana lahat suportahan ang love story nina Cara at Jagger.”
Si Ruru naman ay isa sa pinakamahusay na homegrown artist ng GMA-7. Matapos siyang umangat sa mainstream popularity sa Protégé: Battle For The Big Artista Break, nagbida si Ruru sa ilan sa top-raters ng GMA-7 tulad ng Dormitoryo, Let The Love Begin, Encantadia, Alyas Robinhood, ang katatapos lamang na TODA One I Love, at iba pa.
Ipinahayag ni Ruru ang kasiyahan sa pelikula nilang ito ni Jasmine. “Dream come true po ito. Excited at kinakabahan po ako. Matagal ko na pong pangarap na makatrabo si Jasmine dahil naniniwala po ako na isa siya sa pinakamahuhusay na aktres ng kanyang henerasyon. Nagpapasalamat ako sa APT sa tiwalang ibinigay nila sa akin at kay Jasmine. Ito ang proyektong hinding-hindi ko makakalimutan. Very proud po ako sa Cara X Jagger.”
Tampok din sa Cara X Jagger sina Dante Rivero, Dino Pastrano, Gabby Padilla, Miko Raval, Kenneth Medrano, Michelle Dee, at Sophie Albert. Ipalalabas ang pelikula sa mga sinehan sa buong bansa simula sa 6 Nobyembre.
Para sa mga karagdagang impormasyon at mga kapana-panabik na updates sa Cara X Jagger, sundan ang @aptentertainment.ph sa Instagram at i-like ang APT Entertainment, Inc. sa Facebook.
ALAM MO NA!
ni Nonie Nicasio
