“Toilets for all gender stripes” ipinagmalaki ng Tourist site sa Palawan farm

SUMISIKAT ngayon ang isang farm tourist destination sa Palawan sa pagkonsepto ng isang ‘gender sensitive’ na palikuran para sa lahat ng uri ng kasarian.

Dalawang taon na simula nang buksan ng Yamang Bukid Farm sa Barangay Bacungan, sa lungsod ng Puerto Princesa, ang palikuran na ipinagagamit sa lahat kahit ano ang kanilang sexual orientation.

Sa pangangasiwa ng mga nakatatandang kaba­baihan sa Yamang Bukid Farm, ang paliku­ran ay nahahati nang maluluwag na pasilyo para sa may mga markang ‘girl,’ ‘boy,’ ‘bakla,’ at ‘tomboy.’

May bubong na yari sa mga indigenous na materyales ang pabilog na palikuran na gawa sa konkreto at naging tourist attraction din ito sa mga bumibisita.

Sa labas nito ay may porselanang lababo at gripo na hugasan ng kamay.

May inodorong de-flush at bidet hose para panglinis ng lahat ng cubicle ng palikuran.

Sa labas nito ay madaling mabasa ang mga pangalan sa ibabaw ng bawat isang pinto na gawa sa kahoy.

Sa puting tinta na nakasulat sa itim na background, mababasa ang GIRL, BOY, BAKLA at TOMBOY sa bawat pintuan.

Kung ang salitang bakla at tomboy ay tila nakasasakit sa damdamin ng iba, para naman kay Bobby Arzaga, isang Palawan-based vlogger at receptionist para sa Farm, ang mga terminong ginamit dito ay para i-describe ang sexual label at walang halong malisya o intensiyon na makasakit ng damdamin.

“I’m not offended because that’s how I want people to see me. I don’t know with other gays if they’re offended, though,” saad ni Arzaga na gumagamit ng pasilyo na may label na bakla imbes sa ‘boy.’

Subsidiary ng health and wellness products-maker na Yamang Bukid Healthy Products Inc. (YBHPI) ang The Farm na lugar para sa organic-based agriculture.

May adbokasiyang equality para sa lahat, na niyayakap at rumerespeto sa lahat ng gender stripes, ayon sa designer ng palikuran na si Benjie Monegasque.

“This is a reflection of doing business with a heart. Yamang Bukid welcomes and embraces all gender. The Yamang Bukid brand promotes equality, respect and tolerance,” wika ni Monasque.