Beteranang aktres, nagtampo sa ‘di pagbati ni action star

NAGHIHINANAKIT ang isang beteranang aktres sa isang sikat na action star dahil sa pang-iisnab umano nito sa kanya sa isang pagtitipon.

Ang nasabing showbiz gathering ay naganap sa lamay ng isang premyadong aktor (kailangan pa bang banggitin kung sino siya?).

Ang kuwento, unang dumating ang aktres kaya naman pinalibutan siya ng mga kasamahan sa hanapbuhay bilang respeto na rin sa kanya. Maya-maya’y dumating na rin ang action star pero hindi man lang ito lumapit sa kinaroroonan ng aktres para magbigay-pugay.

Doon umano sumama ang loob nito, na ginatungan pa ng malapit na kaibigan nito. “Hmp! Akala mo kung sino, eh, nakadikit lang naman sa isang politiko!” sey ng veteran actress’ friend patungkol sa isnaberong aktor.

Hindi tuloy nito maiwasan na isumbat (pero sa loob-loob lang niya) na hindi pa raw bayad ang malaking pagkakautang ng action star sa namayapang mister ng beteranang aktres.

Da who ang veteran actress at ang action star? Itago na lang natin sila sa alyas na Sue Santa Rosa at Filemon Aparador.

(Ronnie Carrasco III)