HATAW! D'yaryo ng Bayan hatawtabloid.com
WISH ng award-winning child actor na si Kenken Nuyad na sundan ang yapak ng dating Child Wonder na si Niño Muhlach. Bilib daw kasi siya kay Niño dahil maraming pinagbidahang pelikula at nakasama ang mga pinakasikat na mga artista noon.
“Kasi po ang galing niyang artista noong bata pa siya at siya ang original na Child Wonder… Gusto ko po sana siyang makausap in person at hihingi ng advice sa kanya, kaso mayaman po siya, baka hindi niya po ako papansinin,” esplika ni Kenken.
Dagdag niya, “Hindi po ba, nakasama niya noon sina Mang Dolphy, FPJ at kung sino-sino pa po? Maging sa comedy man o drama at action ang galing po ni Niño, nakakatuwa siya. Kasi po napapanood ko siya sa TV, ‘yung mga palabas niya noon.”
Si Kenken ay 11 years old, Grade 6 sa Kasiglahan Village Elementary School at tulad ng maraming taga-showbiz ay home study ang sistema ng pag-aaral.
Isa siya sa bida sa indie film na pinamagatang The Fate ni Direk Rey Coloma. Mula sa Star Films Entertainment Productions ni Ms. Elenita Tamisin, tampok din dito sina Kelvin Miranda at Elaiza Jane.
Ang The Fate ay kuwento ng magkapatid na hindi mapaghiwalay na sina Karl (Kelvin) at Eric (Kenken), na nagsisikap mabuhay sa sarili pagkamatay ng kanilang ama. Sa pag-iwan ng ina noong bata pa sila, tumira si Karl kasama ang maliit na kapatid na si Eric sa lansangan at nabubuhay sila sa pagbebenta ng mga plastik at bote. Ang video ni Karl na kumakanta ay naging viral na naging daan sa pagkakilala nila ni Eloisa (Elaiza). Ang kanilang relasyon ay hahantong sa mga hindi inaasahang pangyayari na magpapabago sa kanilang buhay.
Tampok din sa The Fate sina Akihiro Blanco, Gaye Piccio, John Matthew Uy, Lewis Simpson, Gab Lopez bilang Lindo, Cris Bacula, Atheena Santamaria, JC Montecarlo, Jethany Miranda, at Ryan Arizala. Introducing sina Aaron Concepcion at Ejay Fontanilla, with the special participation ni Christian Vasquez.
Ang pelikula ay may premiere night sa August 25, 2019 sa SM Megamall, Cinema 4, 8pm.
ALAM MO NA!
ni Nonie Nicasio
