HATAW! D'yaryo ng Bayan hatawtabloid.com
TULUYAN nang napundi si Pangulong Rodrigo Duterte sa iba’t ibang sulsol at sumbong na sa kanya’y ipinararating kaugnay ng operasyon ng Philippine Charity and Sweepstakes Office (PCSO).
Siyempre lahat ng mga nakabukas na gripo na nakadugtong sa ‘bituka’ ng PCSO ay may kani-kaniyang interes sa operasyon nito…
Kaya kani-kaniya rin silang sumbong kay Pangulong Digong.
At doon sila nagkamali.
Kasi nga naman, naglagay siya ng tao sa PCSO para ayusin ‘yang ‘graft-ridden’ agency nang sa gayon ay mag-akyat ng kita sa pamahalaan na itutulong naman sa programang nakatuon sa financial and medical assistance sa mga nangangailangan.
Pero hindi sila nagtulong-tulong para maaresto ang korupsiyon kundi nagsilipan pa ng kanilang mga raket.
Sa buwisit ng pangulo, tuluyang ipinasara ang PCSO.
Wala naman daw talagang naiaakyat na malaking halaga sa gobyerno ang PCSO pero kung mag-ulat ay pagkalaki-laki ng gastos.
E saan ba talaga napupunta ang pera ng PCSO?
Panay ang press release na malaki na ang ingreso ng mga local STL pero saan napupunta?
Akala yata ng mga kamoteng sundot-urot sa Pangulo ‘e madali siyang papaniwalain sa mga sulsol.
Kaya ngayon, ang banta ng Pangulo, hintay kayo riyan…
Hintayin lang daw natin ang ilang araw at nakahanda ang Pangulo na ilantad sa publiko ang ‘malalaking tao’ na sangkot sa ‘grand conspiracy’ na umiiral sa gaming operations ng PCSO.
Hudyat ba ito nang isang malaking laban na naman ni Pangulong Digong laban sa matatakaw sa kuwarta na para sana sa bayan?!
Ang isa pang tanong, kung ipinatigil ni Digong ang lahat ng palaro ng PCSO gaya ng STL, matitigil na rin kaya ang jueteng?
Hindi kaya parang nagpipiyesta ngayon ang jueteng operators dahil sa pagpapatigil ng PCSO gaming operations?
Abangan natin sa mga susunod na araw.
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap
