HATAW! D'yaryo ng Bayan hatawtabloid.com
HINDI malilimutan ni Kyle Lucasan ang naging karanasan niya sa StarStruck ng Kapuso Network. Kahit na nabigo si Kyle sa pangalawang pagkakataon na ibinigay sa kanya rito, nagpapasalamat pa rin siya sa chance na ipinagkaloob sa kanya ng Artista Search ng GMA-7.
“Noong binigyan kami ng second chance, actually po, parang ano e — I mean makapasok or hindi, okay lang. Pero siyempre nandoon pa rin na parang mas masakit, dahil dalawang beses po, e. Pero thankful pa rin po kami na they still tried us. Kasi, not everyone will get a second chance, e,” sambit ni Kyle nang makahuntahan namin sa birthday bash ni katotong Leo Bukas.
Si Kyle ay kilala rin bilang Quinn Carillo ng grupong Belladonnas.
Mas tumapang ba siya dahil sa experience niya sa Starstruck? “Definitely po, kasi I faced rejection twice. So nandoon po ‘yung eagerness pa rin na kailangan next time, mas maging successful.”
Ano’ng reaksiyon niya na sa social media ay maraming nanghihinayang na sana ay nakapasok siya sa Final 14?
“Siyempre po sobrang flatter, kasi I didn’t know na ganoon pala karami na ‘yung sumusuporta sa akin. Kasi parang I don’t know… noong nakita ko na ang daming nagko-comment… sobrang na-flatter po ako. Wow! Maraming-maraming salamat po talaga sa pagsuporta.”
Sino ang gusto niyang makatrabaho sa mga young actors and actresses sa GMA-7? “Actually po si Miss Kyline (Alcantara), kasi magaling po si Miss Kyline, e. Sa lalaki, crush ko talaga ‘yung kuya ni Rere, hahaha! Si Ruru po,” nakangiting tugon pa niya.
Si Kyle ang itinuturing na pambato ng mga morena beauty dahil magaling siyang sumayaw, kumanta, umarte, at edukada. Pasok din si Kyle na maging younger version or bagong Rochelle Pangilinan ng GMA-7 dahil nahulma ng 3:16 Events & Talent Management ni Ms. Len Carillo ang kanyang talento.
Nakita namin kung gaano kadeterminado at pursigido si Kyle, kaya sure kami na ang anomang nangyari sa Starstruck ay simula pa lang ng kanyang mahabang showbiz journey para makamit ang inaasam niyang panagarap.
ALAM MO NA!
ni Nonie Nicasio
