HATAW! D'yaryo ng Bayan hatawtabloid.com
AMINADO si Alden Richards na fan siya ng direktor nilang si Cathy Garcia Molina. Kaya naman dream come true ang makatrabaho ang lady director.
Sa mediacon ng Hello, Love, Goodbye, sinabi ng actor na bago pa man siya mag-artista, fan na siya ng direktor.
“Gustong-gusto ko ang mga pelikula niya tulad ng ‘One More Chance.’ Lahat ng pelikula ni Direk, pinanonood ko. Pinangarap ko talagang makaarte sa kamera ni Direk,” ani Alden.
Hindi ito ang unang pagkakataong nakatapak ng ABS-CBN ni Alden. Kuwento ng actor, “I was 14 when I came here. Nag-audition ako sa mga reality show nila. Medyo overwhelm, naninibago, hindi ko po ine-expect na ang isang GMA actor eh makakatapak sa ABS-CBN and I’m really thankful for the opportunity given to me specially the GMA for letting me do this film. Masaya po ako.”
All praise naman si Alden kay Kathryn dahil sa sobrang dedication nito sa trabaho. “We share the same passion sa acting. She wanted more, hindi nakokontento sa tama lang. Pareho naming mahal ang ginagawa namin. Na mayroon pa pala kaming higit na dapat malaman kaysa sarili namin. At nadagdagan ko ang kaalaman ko bilang aktor.”
Samantala, nagkita na pala before pa sina Alden at Daniel Padilla. “Nagkita na kami sa mga event pero hi and hello lang. Ito mas personal kasi nakatrabaho ko si Kath. Bale personal kong nakausap si Daniel noong pumunta si DJ sa tent naming pero rito na sa Pilipinas, hindi sa HongKong. Kasi noong nagkita kami sa HK, parang nagkahiyaan, siyempre may mga ganoon talagang instance,” sambit ni Alden.
Kuwento pa ni Alden ukol kay DJ, “mabait si Daniel. Nag-congratulate siya sa pelikula naming at nagpasalamat siya na inalagaan ko si Kathryn. So, parang ang gaan lang ng pelikula kasi wala kaming nasagasaang tao. Natapos ang pelikula ng peaceful at hindi na kami makapaghintay na mapanood ninyo.”
At bago matapos ang mediacon, natanong si Direk Cathy kung ano ang masasabi niya kay Alden. Anang magaling na direktor, nadiskubre niyang hindi lang pala marunong umarte si Alden, bukod sa talagang mabait na bata, mahusay pala talaga itong actor na ikinasiya ng actor at biglang yakap na paluhod na nagtungo sa direktor na animo’y isang batang inaamo ang ina.
Dagdag pa ni Direk Cathy, maganda ang istorya ng pelikula at tiyak na maraming OFW ang makare-relate. Hindi lang ang galing sa pag-arte ng mga bidang artista ang ipinagmamalaki niya rito maging ang istorya nito na talagang uukit sa mga puso ng viewers.
SHOWBIZ KONEK
ni Maricris Valdez Nicasio
