Pacman, magko-concert kahit walang hilig sa kanya ang kanta

SA kabila ng pagiging busy, wari’y kulang pa yata ang mga makabuluhang gawain ni Senator Manny Pacquiao na balitang magkakaroon ng major concert sa September 1.

Ilang beses nang naiulat na numero unong absentee ang boxer-turned-politician sa Senado, eto’t may dahilan na naman siya para lumiban sa mga session bilang paghahanda sa kanyang kauna-unahang concert.

Naalala tuloy namin ang guesting ni Pacman sa Startalk ilang taon na ang nakararaan. Kapapanalo lang niya noon sa kanyang laban.

Bukod siyempre sa karaniwang sit-down interview kung ano ang kanyang pakiramdam sa pag-uwi na naman ng karangalan para sa bansa ay may bonus na gimik ang live guesting na ‘yon ni Pacman to spice up the segment.

Ang gimik na ‘yon ay ang pakantahin ang Pambansang Kamao. Pinili niyang awitin ang kantang Sometimes When We Touch.

Pumagitna si Pacman sa platform na nagsilbing stage. Pumasok ang intro ng kanta. Sa bandang refrain ay doon na nagkaroon ng ibang direksiyon ang pasable na sanang rendition niya.

“Sometimes whn we ‘tats’ (sic), the honesty’s too ‘mats’ (sic),” banat ni Pacman sa refrain.

Kahit sino naman sigurong professional singer ang tanungin, mahalaga ang tamang bigkas ng lyrics. Hindi lang basta nasa tono, o sa timbre ng boses. Mahalaga rin ang diction.

But of course, hindi naman isang professional singer si Pacman. Hilig lang niyang kumanta.

Kaso, wala itong hilig sa kanya kaya huwag na niya itong ipagpilitan pa.

HOT, AW!
ni Ronnie Carrasco III