James, ‘ginaya’ si Angel, spinal column problema rin

TREND setter talaga si Angel Locsin. Sinimulan lang niya iyong pagtanggi sa pelikulang Darna dahil sa kanyang problema sa spinal column na ipina-opera na nga sa Singapore, nasundan pa iyon ni Liza Sobe­rano  na nabalian naman ng buto sa kamay.

Nga­yon pati si James Reid ay may problema na rin sa spinal column kaya hindi na matutuloy iyong pelikula niyang Pedro Penduko. Ang nata­tan­daan naming sinabi noong una, nagkaroon lang ng injury si James sa kanyang balikat dahil sa training niya para riyan sa Pedro Penduko. Aba hindi lang pala balikat ang tinamaan, kundi pati spinal column.

Ang sabi nga niyong isang kaibigan naming doctor, iyang mga artista kasi madalas na mapuyat, at iyong kanilang exercise karaniwang sa gym, hindi kagaya niyong iba na tuma­takbo o nagsa­sanay sa ilalim ng init ng araw. Eh iyang mga artista, ayaw umitim kaya hindi nagpapa-araw. Maaaring naaapektuhan ang kanilang mga buto kaya ganyan. Dapat uminom ng vitamin D-3, at baka kailangan din ng calcium para mas tumibay pa ang buto.

Ang isa pang problema, mahirap gumawa ng action pictures ngayon sa Pilipinas, lalo na iyang ganyang super hero type. Ikukompara iyan sa Avengers, at ngayon may lalabas pang Spiderman. Tapos kung lalabas kang kulang sa opticals, aray, mapipilayan ka nga sa takilya naman.

May mga nagbibiro na nga, “mas madaling mapilayan na lang ang mga artista, kaysa mapilayan pa ang producers sa takilya.”

Iyong isa ngang film producer, umiiyak na dahil pilay na pilay na siya sa takilya. Kasi naman ang mga pelikula niya, bukod sa hindi kilala ang mga artista at director, ipino-promote lang sa Facebook. Ano nga ba ang aasahan mong kita?

HATAWAN
ni Ed de Leon