Sino Ang Maysala?, wagi agad sa rating

TINUTUKAN agad ng mga manonood ang pinakabagong Kapamilya primetime serye, Sino Ang Maysala?: Mea Culpa dahil sa pagtatala nito ng 22.2%, sa unang episode nito sa national TV rating ayon sa datos ng Kantar Media.

Hindi naman kataka-taka dahil kapana-panabik agad ang mga eksena na nagsimula ang pagtakas ng anim na magkakaibigan mula sa isang krimen.

Nakakuha lamang ang katapat nitong Love You Two ng 13.9%.

Bukod sa telebisyon, marami rin ang sumubaybay online sa pagsisimula ng serye kaya naman pumwesto ang hashtags na #SAMGabiNgKrimen at #SinoAngMaySala sa top trending topics ng Twitter. Katunayan, tinawag pa ito ng ilang netizens na “super intense,” “bold,” “exciting, at “a masterpiece.”

Ipinakita ang buhay ng mga law student na sina Juris (Bela Padilla), Andrei (Tony Labrusca), Gaylord (Sandino Martin), Greco (Kit Thompson), Lolita (Ivana Alawi), at Bogs (Ketchup Eusebio) nang magdiwang ang mga ito sa Baguio matapos pumasa sa bar.

Sa kalagitnaan ng pagsasaya, nauwi sa aksidente ang kanilang road trip nang mabangga at mapatay ang isang babae. Nagtalo-talo ang anim kung iiwan ba o pananagutan ang krimen.

SHOWBIZ KONEK
ni Maricris Valdez Nicasio