2 patay sa trailer truck na nahulog sa tulay (4 sugatan)

NAWALAN ng preno at tuluyang nahulog ang isang 40-footer container van sa Zamora Interlink Bridge sa Zamora St., Pandacan, Maynila na ikinamatay ng mag-lolo at ikinasugat ng apat pa nang madaganan ang kabahayan sa ilalim ng tulay dakong 3:00 pm kahapon. (BONG SON)

A post shared by HATAW! – Diyaryo ng Bayan (@hatawtabloid) on Sep 27, 2017 at 6:23pm PDT

PATAY ang maglolo habang apat ang sugatan makaraan mabagsakan ng 20-footer container truck na nahulog mula sa Zamora Interlink Bridge sa Zamora St., Pandacan, Maynila, nitong Miyerkoles ng hapon.

Sinabi ni Supt. Rolando Gonzales, commander ng Manila Police District Pandacan Station (PS10), nangyari ang insidente dakong 3:00 pm.

Ayon sa ulat, ang truck ay nasa Zamora Interlink Bridge nang ito ay mahulog at bumagsak sa kabahayan sa Tomas Claudio street.

Kinilala ng mga awtoridad ang mga namatay na mag-lolo na sina Danny Baltazar, 70, at John Dave Baltazar, 8-anyos.

A post shared by HATAW! – Diyaryo ng Bayan (@hatawtabloid) on Sep 27, 2017 at 6:24pm PDT

Sa kabila ng paggamit ng crane ng rescuers, mahigit isang oras bago nakuha ang bangkay ng dalawang biktima

Sugatan din sa insidente ang isang kaanak ng mga biktima at isang kapitbahay.

“Parang lumindol, tsaka ako lumabas. Pagkatapos nakita ko… tumbok pala sa bahay namin. Tumakbo na ako,” pahayag ni Juanita Baltazar, misis ni Danny.

Ang driver ng truck at kanyang assistant ay kapwa rin nasugatan. Isinisi ng driver na si Reynaldo Acosta sa faulty brake system ang insidente.

“Nag-apply ako ng preno, ‘di na po kumagat. Dalawang beses nga ako nag-apply. Mabagal lang po kami kasi traffic,” ayon kay Acosta.