Beteranang aktres, nantuso raw ng balikbayang kaibigan

KUNG tutuusi’y hindi na bago ang kuwentong ito tungkol sa isang beterang aktres.

May “sequel” kasi tungkol sa pagiging tuso niya. Kamakailan ay nakipagkita sa kanya ang isang balikbayan friend, bitbit nito ang pitong iba’t ibang panindang branded bags.

Ang siste, nang mailatag na ng negosyante ang kanyang mga kalakal ay walang kaabog-abog na dinampot ng aktres ang isa roon.

Hindi pa siya nakuntento, binitbit din niya ang anim pang branded bags. Ang sabi’y ibebenta niya ‘yon.

Dumaan ang ilang araw. Asang-asa ang negosyante na sa anim na bags ay may naibenta man lang kahit ilang piraso ang katransaksiyon niya.

Kaso, nang muling magpakita sa kanya ang aktres ay isinauli ang mga ‘yon, pero kulang ng isa. ”Naku, limang bag lang ‘yung kinuha ko sa ‘yo!”halos makipagpatayang giit nito.

Pero natuklasan ng negosyante na ‘yung missing bag ay nasa ibang tao na, na-trace ‘yon dahil sa serial number.

Pero kung inakala n’yong napahiya ang showbiz personality dahil sa pandaraya niya, nagpalusot na lang ito na babayaran na lang niya ang bag na ‘yon.

Da who ang aktres? Itago na lang natin siya sa alyas Dahlia Romulo.

(Ronnie Carrasco III)