HATAW! D'yaryo ng Bayan hatawtabloid.com
NAKATAKDANG imbestigahan sa Senado sa susunod na linggo ang “secret jail” na natuklasan sa police station sa Tondo habang iniinspeksiyon ng Commission on Human Rights (CHR).
Ayon kay Sen. Bam Aquino, siyang naghain ng resolusyon para imbestigahan ang isyu, nagbigay ng commitment si Sen. Panfilo Lacson, pinuno ng Senate Committee on Public Order and Dangerous Drugs, hinggil dito.
Tiniyak aniya ni Lacson, sa susunod na linggo ay sisimulan na ang pagdinig.
Samantala, binatikos ng senador ang pamunuan ng PNP bagama’t hindi direktang tinukoy si PNP chief, Director General Ronald Dela Rosa, sa pagdepensa sa mga pulis na sangkot sa pagkakaroon ng sikretong kulungan sa Tondo.
Malinaw ayon kay Aquino, na paglabag sa Saligang Batas at karapatang Pantao ang ginawa ng mga pulis.
Hindi pa man aniya nalilitis ang nasabing mga pulis ngunit mistulang inabsuwelto na ng pamunuan ng PNP.
