‘Massage therapist’ nangmolestiya ng buntis

INARESTO ang isang lalaking masahista makaraan molestiyahin ang isang buntis habang minamasahe sa isang spa sa Parañaque City, nitong Martes ng gabi.

Salaysay ng 28-anyos biktimang itinago sa alyas na Toni, Lunes nang siya ay magpamasahe sa 19-anyos na si Arwin John Martinez.

Nagpresenta aniya si Martinez na magmasahe ngunit kanyang napansin na kakaiba ang naging pagmamasahe sa kanya ng suspek.

Ani Toni, nakatakip ang kanyang mga kamay sa kanyang dibdib ngunit gusto itong alisin ni Martinez. Aniya, “Parang may kasamang puwersa na po.”

Hindi agad nakapagreklamo si Toni sa spa kaya lumapit siya sa mga opisyal ng barangay nang sumunod na araw, at agad inanyayahan si Martinez doon kinagabihan at saka inaresto.

Sa barangay hall na nagkaharap ang dalawa.

Inamin ng suspek na hindi ito ang unang beses na nanghipo siya ng kliyente ngunit idiniing nagsisisi siya sa kanyang ginawa.

Napag-alaman, walang lisensiya si Martinez para maging therapist.

Haharapin ni Martinez ang mga kasong acts of lasciviousness at attempted rape.

Samantala, sisilipin ng barangay kung may mga pagkukulang sa permit ang spa.