Raffy Reyes, nagpamalas ng husay sa pelikulang Bubog

KAHIT baguhan pa lang si Raffy Reyes, nagpakita siya ng mahusay na performance sa debut film na Bubog ni Direk Arlyn Dela Cruz. Ang pelikula ay sumasalamin sa nangyayaring giyera ngayon ng pamahalaan kontra sa droga.

Inusisa namin ang role niya sa pelikula. “Ang aking role sa pelikula ay ang nangangarap na “fresh grad” na si Armand Sanchez. Pangarap niyang maging reporter mula nang siya’y nagtapos sa kolehiyo.

“Sa pelikula, nais niya pong ilabas ang katotohanan sa likod ng mga pagpatay sa mga taong gumagamit ng droga, sa pamamagitan ng kanyang trabaho bilang isang field reporter. Sa kanyang palagay, may istorya sa likod ng mga “summary executions” na nagaganap mula nang umupo sa puwesto ang bagong presidente (sa pelikula) na si Ronaldo Delgado. Ngunit, sa kalagitnaan ng pelikula, siya’y may matutuklasan tungkol sa kanyang pamilya na magpapabago sa kanyang buong buhay,” pahayag ni Raffy.

Paano siya nagsimula sa showbiz? “Nagsimula po ako sa showbiz noong ako’y nakakuha ng aking unang commercial sa Smart Telecoms noong nakaraang Agosto, 2016. Maliban doon, lumabas rin po ako sa ibang mga komersiyal at nakapasok po ako sa pelikulang Bubog noong ako’y natanggap sa aking pinag-audition na role,” wika ng 23 years old na actor na nagtapos ng Business Management sa Ateneo de Manila University.

Dagdag pa niya, “Nagkaroon po ako ng mga acting workshop noong ako’y nasa Ateneo de Manila University. Sumali po ako sa isang organisasyong pangteatro-ang Blue Repertory. Doon, binigyan po ako ng mga acting workshop para masanay sa pag-arte sa entablado. Nakatulong siya sa pagkasanay kong umarte sa harap ng mga manonood.

“Nagbigay din si Direk Arlyn ng acting workshop para sa Bubog, na ang namahala ay si Julio Diaz bilang head coach namin sa cast. Sa paghahanda sa aking role para sa Bubog, inaral ko po ang aking character at binuo ko po siya sa aking isipan gamit ang mga itinuro sa akin sa mga acting workshop. Ito’y para mas maging solid at totoo ang character kapag siya’y nasimulan ko nang artehan. Nakipag-usap din ako kay Direk Arlyn ukol sa mga nais kong malaman tungkol sa aking character para mas madali ko pong mabigyan ng buhay ang pag-arte rito.”

Mula sa Blank Pages Production at Asian Premier Resources Trading Corporation nina Andrea Cuya at Aya Sycon, tampok sa Bubog sina Julio Diaz, Elizabeth Oropesa, Jackie Lou Blanco, Juan Rodrigo, Allan Paule, Jak Roberto, Karl Medina, Janice Jurado, Kristofer King, Chanel Latorre, Jemina Sy, at iba pa.

ALAM MO NA! – Nonie V. Nicasio