HATAW! D'yaryo ng Bayan hatawtabloid.com
ABU DHABI – Apat Filipino ang namatay sa isang aksidente sa Abu Dhabi sa kalagitnaan ng Visita Iglesia.
Kabilang sa namatay sina Veronica Dulay, Daniel Paulo Paraiso, Ian Elli, at Marvin Mendoza.
Samantala, naka-confine sa isang pagamutan ang kapatid ni Paraiso na si Ana Paula, at kapatid ni Mendoza na si Mary Ann.
Sa unang impormasyon, sumabog ang gulong ng sinasakyan ng magkakaibigan nitong Biyernes ng umaga sa Al Shahama.
Bumaba ang driver na si Dulay kasama sina Daniel, Marvin at Ian Elli para tingnan ang pumutok na gulong habang naiwan ang mga kasama sa loob ng sasakyan.
Saktong may mabilis na sasakyan sa likod na siyang bumangga sa apat at sa kanilang nakaparadang sasakyan.
Kasalukuyang nasa morgue ng Khalifa Hospital ang labi ng apat.
Iniulat na itinakbo rin sa hospital ang nakabangga sa kanila.
Iniimbestigahan na ng mga awtoridad ang insidente.
Nakikipagtulungan na ang Embahada ng Fi-lipinas, Konsulado ng Fi-lipinas sa Dubai at ilang organisasyon ng mga Fi-lipino sa United Arab Emirates, sa kaanak ng mga biktima.
HATAW News Team
