HATAW! D'yaryo ng Bayan hatawtabloid.com
ZAMBOANGA CITY – Umaabot sa 15 katao ang nakagat ng asong ulol na pumasok sa dalawang paaralan sa Isabela City sa lalawigan ng Basilan.
Sinasabing karamihan sa mga naging biktima ay mga estudyante kasama ang ilang guro at ang dalawang bata.
Ayon sa impormasyon, unang nakapasok ang asong ulol sa Basilan National High School (BNHS) at bigla na lamang kinagat ang ilang estudyante at guro.
Pagkatapos nito ay nakatakbo palabas ang aso at pumasok din sa Claret College of Isabela (CCI) at nakagat din doon ang ilan pang estudyante at guro.
Agad nagresponde ang medical team ng Isabela City para madala agad sa pagamutan ang mga nakagat na biktima at agad binakunahan ng anti-rabies.
Karamihan sa mga biktima ay nakagat ng aso sa kanilang mga paa.
Hindi matukoy kung napatay na ang nasabing ulol na aso dahil masyado itong agresibo at nakatakbo palayo ng paaralan.
Inaalam ng mga awtoridad kung may nagmamay-ari sa nasabing aso o isa siya sa napakaraming mga asong kalye.
