Sweet 16 na-gang rape ng 4 totoy

CAUAYAN CITY, Isabela – Sinampahan ng kasong rape ang apat kalalakihan na inakusahang halinhinang gumahasa sa isang dalagita sa Santiago City.

Nakakulong na ang mga suspek na kinabibilangan ng isang 18-anyos binatilyo at tatlong menor de edad na 13 hanggang 17-anyos.

Ang biktimang si alyas Alet, 16-anyos, ay nasa pangangalaga na ng “Bahay Namnama” sa Balintocatoc, Santiago City.

Nagsumbong sa Presinto 2 ng Santiago City Police Office (SCPO) ang dalagita makaraan gahasain ng apat na kaibigang lalaki.

Ayon kay Chief Insp. Reynaldo Maggay, station commander ng Presinto 2, unang nagreklamo si Alet sa mga barangay tanod.

Lumabas sa imbestigasyon ng SCPO, nag-inoman sa isang beerhouse ang biktima at apat na kaibigan ngunit nagkasundo na lumipat sila sa bahay ng isa sa mga suspek.

Nang mahilo ang dalagita ay dinala siya sa isang silid at unang gumahasa sa kanya ang 18-anyos na suspek bago sumunod ang tatlong menor de edad.

Inaresto at agad kinasuhan ng mga pulis ang mga suspek makaraan magsumbong ang biktima sa SCPO.