Kikay at Mikay, hindi natuloy ang stage play with Bianca Umali

NANGHIHINAYANG kami dahil hindi natuloy ang stage play na gagawin dapat nina Kikay at Mikay, kasama ang Kapuso aktres na si Bianca Umali. Nabalitaan namin ito sa mother ni Kikay na si Mommy Diana.

“Conflict po sa schedule, kaya hindi na po tuloy ang stage play with Bianca Umali. Sayang nga po, pero okay lang, better luck next time na lang po ang naisip namin,” saad sa amin ni Mommy Diana.

Sa ngayon, bukod sa pelikulang Field Trip ni Direk Mike Magat ay marami silang shows. Abala rin sina Kikay at Mikay sa pagtulong sa pag-promote ng pelikulang Mga Batang Lansangan na pinamahalaan din ni Direk Mike.

“This Saturday, sina Kikay at Mikay po ay nasa SM Baliuag, Bulacan para mag-promote ng movie na Mga Batang Lansangan with Direk Mike Magat kaya nagpapasalamat kami sa sponsor, ang restaurant owner na si Maam Karen na Delicioso All You Can Eat restaurant na matatagpuan sa Dr. Gonzales St., Baliuag Bulacan. Sa December 11 po ay may All Star Game show naman po sila na kasama sina Direk Mike, Rocco Nacino, Carlo Cepeda, Onyok Velasco, at marami pa pong ibang artists,” kuwento pa sa amin ni Mommy Diana.

Dagdag pa niya, “May advance invitation din sina Kikay at Mikay sa concert ng New Discovery Casting na gaganapin sa January 4 or 11 this coming year 2017 sa Zirkoh or Clownz. Under management ito nina Ms. Jane at Sir Miguel.”

Sina Kikay at Mikay ay Viva contract artist na binigyan ng five year contract dito. Si Kikay ay seven years old, samantalang si Mikay ay ten years old naman. Nakakabilib ang dalawang bagets dahil sa magaling sila kapwa sa sayawan, kantahan, at pag-arte and sure ako na malaki ang future ng dalawa sa mundo ng showbiz.

ALAM MO NA! – Nonie V. Nicasio