Bata idinamay ng ama sa suicide (Dinamita pinasabog)

NAGKALASOG-LASOG ang katawan ng isang 4-anyos bata makaraan idamay sa pagpapakamatay ng kanyang ama sa pamamagitan ng pagpapasabog ng dinamita sa Vinzons, Camarines Norte nitong Sabado.

Patay na ang bata nang matagpuan sa tabi ng kanyang walang buhay na ama na si Alfonso Asis, 31, sa kama sa loob ng kanilang bahay sa Purok 2, Brgy. Singi.

Kuwento ng isa pang anak ni Alfonso, nagising siya sa malakas na pagsabog sa loob ng kanilang bahay at nakita niyang wala nang buhay ang ama at kapatid.

Naniniwala siyang nagpakamatay ang amang minero na marunong gumamit ng pampasabog, bagay na kinompirma ng kinakasama niyang si Ronabelle Talla.

Ayon kay Talla, nag-away sila ni Alfonso nitong Biyernes dahil sa selos at kung sino mangangalaga sa kanilang anak.

Pasado 8:00 pm nitong Sabado, nakausap niya si Alfonso sa cellphone at pinagbantaan siyang idadamay ang anak sa pagpapakamatay kung hindi siya uuwi sa loob ng dalawang oras.

Walang nakikitang foul play ang mga pulis sa insidente.