Benj Manalo, thankful sa pag-aaruga ng ABS CBN

PATULOY sa pagiging aktibo sa TV si Benj Manalo, anak ni Jose Manalo at nakababatang kapatid ni Nicco Manalo. Sa ngayon ay napapanood si Benj sa top rating series na Ang Probinsyano ng ABS CBN na tinatampukan ni Coco Martin. Gumaganap dito si Benj bilang cameraman ni Yasi Pressman na siya namang love interest ni Coco.

Nakapanayam namin si Benj thru Facebook at inusisa namin kung Rak of Aegis ba ang unang big project niya?

“Yes, Rak of Aegis po ang first ko na project after a long time na pagiging mananayaw, Napasali po ako roon noong tinawagan ako ng management ko which is Cornerstone at tinanong po nila ako kung gusto kong mag-audition bilang Tolits dahil kailangan daw po nila ng bagong Tolits for the 4th run ng Rak Of Aegis.

“So, nag-audition po ako at nakapasok, kasi para sa akin wala naman akong ginagawa that time at gusto ko po mag-explore at mag-perform sa ibat-ibang platform and sinuwerte po ako at natangap para gumanap Bilang Tolits,” aniya.

Paano ka naman napasok sa ABS CBN?

Sagot ng 29 years old na Kapamilya actor, “Nag-start ako sa ABS CBN dahil sa stint na ginawa ko from Rak Of Aegis, kinailangan ni Direk Antoinette Jadaone ng bagong character for the show On The Wings Of Love na ang bida ay sina James Reid at Nadine Lustre. So, kinuha niya po kami para maging part ng show tapos ayun po, don na ako nag-start.

“Hindi ko nga po ine-expect na aalagaan po ako ng Dreamscape at ABS CBN after ng On The Wings of Love. Pero sobrang pasasalamat ko sa kanila dahil sa tiwala na ibinibigay nila sa akin. Kaya malaki po ang utang na loob ko kina Sir Deo (Endrinal) at sa lahat ng bumubuo ng Dreamscape, kasi hindi nila ako pinababayaan.”

ALAM MO NA! – Nonie V. Nicasio