4-anyos anak sinaksak, ama naglason (Sa selos sa misis)

ZAMBOANGA CITY – Matinding selos sa kanyang misis ang dahilan ng pagsaksak ng isang padre de pamilya sa kanyang 4-anyos anak at kalaunan ay uminom ng lason ang suspek sa kanilang bahay sa Purok Malinawon, Brgy. Paglaum, Dumalinao sa lalawigan ng Zamboanga del Sur kamakalawa.

Ayon sa ulat ng Dumalinao municipal police station,  nasaksak ni Promencio Anghad, 57, ang kanyang anak na si Daisy Mae Anghad sa kalagitnaan ng kanilang pagtatalo ng kanyang misis dakong 3:30 am.

Ayon sa pulisya, tinamaan ng dalawang saksak sa katawan ang paslit.

Makaraan ang insidente, nagtangkang magpakamatay ang suspek sa pamamagitan ng pag-inom ng lason ngunit mabilis na naisugod sa pagamutan.

Labis ang pagsisisi ng suspek sa pagsaksak sa kanyang anak at sinabing ang kanyang misis ang kanyang puntirya dahil sa matinding selos sa ginang.