Friendship, sikreto ng tagumpay ng Banana Sundae

TUNAY na magkakaibigan silang lahat. Ito ang iginiit ni John Prats nang tanungin kung ano ang sikreto na nakaabot sila ng walong taon sa presscon ng Banana Sundae. Ang presscon ay kaugnay ng pagdiriwang ng kanilang ikawalong taon bilang natatanging comedy show ng ABS-CBN.

Ani John, matagumpay ang programa dahil tunay na magkakaibigan silang lahat sa harap at likod ng camera.

“Pag taping, para kaming magkakabarkda na magkikita-kita at magkakatuwaan lang. Kaya siguro nararamdaman din ng mga manonood na totoo ang kwelang hatid namin,” ani John.

“Talagang inaalala namin ang isa’t isa at concerned kami sa kapakanan ng bawat kasama namin,” dagdag naman ni Pokwang.

Pinatunayan din ni Jessy Mendiola, na isa sa recent addition sa Banana Sundaebarkada, ang init ng samahan sa show na agad niyang nadama ilang linggo pa lang siyang sumalang sa set.

“Noong una nahirapan talaga ako sa comedy pero sobrang helpful nilang lahat. Tinulungan nila ako at winelcome ng sobra. Pamilya talaga ang trato namin sa isa’t isa,” pahayag niya.

Kaya bilang pasasalamat ng barkada sa fans, isang anniversary show ang  gagawin nila sa Kia Theater sa Huwebes (Nov 17). Kaya abangan ang pasabog na group production numbers ng Banana Sundae barkada na sina Angelica Panganiban, John Prats, Pokwang, Pooh, Jayson Gainza, JC De Vera, Jessy Mendiola, Ryan Bang, Jobert Austria, Sunshine Garcia, Aiko Climaco, at Badjie Mortizkasama pa ang surprise celebrity guests na sila mismo ang pumili.

Sa kabila ng pinagdaraanang mga pagbabago ng programa, nananatiling tinatangkilik ng manonood ang Banana Sundae. Ito ay consistent top-rater sa weekend at trending din sa social media dahil na rin sa hit segments tulad ng Hugot at Baby Luv at iba’t ibang spoof ng mga pinag-uusapang kaganapan sa politika at showbiz.

Ang programa ay idinidirehe ni Bobot Mortiz kasama ang segment director na si Jem Reyes, executive producer na si Rocky Ubana, creative manager na si Willy Cuevas, at headwriter na si Ricky Victoria sa ilalim ng business unit na pinamumunuan ni Reily Santiago.

Kaya huwag palampasin ang two-part airing ng Banana Sunda8: The 8th Anniversary Special”  sa Nov 20 at 27, pagkatapos ng ASAP sa ABS-CBN.

SHOWBIZ KONEK – Maricris Valdez Nicasio