HATAW! D'yaryo ng Bayan hatawtabloid.com
MULI na namang tatanggap ng karangalan ang tinaguriang Queen ng Indie Films na si Ms. Baby Go. This time hindi sa international award giving bodies galing ang parangal, kundi sa 15th Annual Gawad Amerika Awards. Gaganapin ito sa Celebrity Center International, Hollywood California USA sa November 19, 2016. Pararangalan ang lady boss ng BG Productions International bilang Most Outstanding Filipino in the field of Independent Cinema Productions and Aesthetics.
Ang movie company ni Ms. Baby ay nagsimula ang pagpoprodyus noong 2013 sa katuwaan na isama sa eksena ang apo niya sa pelikulang Lihis ni Direk Joel Lamangan. Kapwa kliyente ng parehong banko sina Ms. Baby at Direk Joel at ang ‘middleman’ ay si Mr. Romeo Lindain. Agad-agad, natuloy ang pagsasapelikula na gumanap na baby ni Lovi Poe ang apo ni Ms. Baby and the rest is history, ‘ika nga.
Sa kasalukuyan, ang BG Productions ang nasa likod ng mga pelikulang Lihis, Lauriana, Bigkis, Homeless, Child Haus, Iadya Mo kami, Sekyu, Laut, Tupang Ligaw, Siphayo, Area, at Balatkayo. Karamihan sa mga pelikulag ito ay award-winning na hindi lang sa Pilipinas kinilala, kundi maging sa international scene.
Ayon naman kay Ms. Baby, labis-labis ang kanyang pasasalamat sa mga parangal at pagkilalang natatanggap niya. “Natutuwa ako at nagpapasalamat sa mga awards na ibinibigay sa akin. Ako naman, masaya na kapag ang mga pelikula ng BG Productions ay kinikilala.
“Patuloy kaming gagawa ng mga pelikulang magaganda, may-aral at pang-award, bilang kontribusyon namin sa sining at para makatulong sa mga nagtatrabaho sa showbiz industry, lalo na ang mga maliliit na nasa likod ng camera.”
ALAM MO NA! – Nonie V. Nicasio
