HATAW! D'yaryo ng Bayan hatawtabloid.com
DALAWANG bata ang patay habang sugatan ang 14 iba pa makaraan mahulog ang sinasakyang van sa kanal sa Southern Tagalog Arterial Road (STAR) Tollway sa Malvar, Batangas, Lunes ng gabi.
Galing sa isang beach resort sa Anilao, Mabini at pauwi sa Pasig ang L300 van ng mga biktima nang mag-overtake sa Kilometer 73 ng tollway.
Nagpagewang-gewang ang van nang mawalan ng kontrol ang driver na si Joseph Fernando hanggang mahulog sa malalim na bahagi ng kanal.
Kinilala ang mga namatay na sina Janelle Anne Delanon, 9, at Jaylord Lance Delanon, 12.
Habang isinugod sa Mary Mediatrix Hospital sa Lipa ang 14 nasugatang karamihan ay mga bata.
Posibleng sampahan ng patong-patong na kaso ang driver na sinasabing nakainom ng alak nang maganap ang insidente.
Sa Cagayan de Oro City
JEEP SWAK SA BANGIN, 20 SUGATAN
CAGAYAN DE ORO CITY – Mahigit 20 ang sugatan nang mahulog sa bangin ang isang jeep kamakalawa.
Sa Sitio Sapong, Brgy. Tablon, papunta sana sa Bukidnon ang mga sakay ng jeep para dalawin ang mga yumaong mahal sa buhay nang maganap ang insidente.
Ayon sa driver, pumutok ang preno at hindi niya nakontrol ang jeep kaya ito nahulog sa bangin.
