HATAW! D'yaryo ng Bayan hatawtabloid.com
NAIS ipatawag at pagpaliwanagin ni Senate committee on public services chairperson Sen. Grace Poe ang pinuno ng National Telecommunications Commission (NTC) kung bakit hindi lahat ng cellphone users na naapektuhan ng supertyphoon Lawin ay nakatanggap ng disaster alert.
Ayon kay Poe, bagama’t may mga nakatanggap ng text blast, higit na marami ang hindi naabot ng mahalagang impormasyon, kabilang na ang mga nasa Metro Manila na isinailalim din sa signal number one (1).
Ngunit dahil naka-break ang sesyon ng mga mambabatas, baka sa susunod na buwan pa maisagawa ang hearing ng Senate committee.
Giit ng senadora, hindi lang dapat ang mga direktang daraanan ng bagyo ang kasama sa information dissemination dahil may mga pagkakataong nag-iiba ang takbo ng bagyo kaya dapat makapaghanda ang lahat para ma-minimize ang pinsala ng kalamidad.
