Krista Miller buntis

 

INAMIN ng starlet na si Krista Miller na siya ay buntis nang ilipat ng piitan sa Valenzuela City Jail mula sa Camp Karingal sa Quezon dahil sa kinakaharap na kaso tungkol sa ilegal na droga.

Nitong Biyernes, emosyonal na nagpaalam si Miller sa kapwa celebrity na nakadetine sa Camp Karingal na si Sabrina M.

Ngunit bago dalhin sa Valenzuela City Jail si Miller, isinailalim muna siya sa physical examination sa Quezon City Police District crime laboratory, at dito niya inamin na maglilimang buwan na siyang buntis.

Snabi ni Miller, maayos ang baby sa kanyang sinapupunan.

Bukod sa ipinagbubuntis, may isa pang anak si Miller na anim buwan gulang, na labis niyang nami-miss.

Aniya, ang anak at ang sanggol sa sinapupunan ang mga inspirasyon niya para makapagbagong-buhay.

Kung mabibigyan ng pagkakataon, nais ng single mom na si Miller na bumalik sa showbiz.

Nakulong si Miller matapos mahuli noong Setyembre 30 sa isang buy-bust operation.

Nahaharap siya sa kasong pagtutulak ng ilegal na droga.

Gaya ni Miller, ang mga anak din ang nasa isip ni Sabrina M., at dahilan sa hangarin niyang pagbabagong buhay.

Nakakulong si Sabrina M. makaraan mahuli ng mga awtoridad sa hiwalay na buy-bust operation.

Nabasahan ng sakdal nitong Huwebes si Sabrina M.