HATAW! D'yaryo ng Bayan hatawtabloid.com
PUNONG-PUNO ng kagalakan ang award-winning actress na si Ms. Sylvia Sanchez sa ibinigay na pagpapahalaga ng Philippine Movie Press Club dahil nominado silang tatlo nina Arjo at Ria Atayde sa 30th Star Awards For Television. Ang award’s night ay gaganapin sa October 23, 2016 sa Monet Grand Ballroom, Novotel Hotel.
“Masaya ako Nonie, sobrang saya lalo na kapag nakikita ko ang mga anak ko na masaya. Hindi ko sukat akalain na mangyayari ito, alam ko na puwedeng ma-nominate ang mga anak ko isang araw kasi marurunong naman silang umarte, pero ang ma-nominate kaming pare-pareho at sabay-sabay ay hindi ko naman inasahan ito. Pero nangyari, iba talaga kapag pinaubaya mo sa Diyos ang lahat. Aayusin Niya lahat para sa iyo, tiwala lang talaga at kapit sa Kanya.
“I’m grateful and honored sa tiwalang ibinigay sa aming mag-iina ng PMPC. Salamat talaga,” masayang saad sa amin ni Ms. Sylvia.
Masasabi ba niyang extra special ito dahil parang first time na nangyari na tatlong mag-iina ay nomina-ted nang sabay-sabay sa isang award’s night?
“Napaka special nito para sa akin kasi tatlo kaming sabay na na-nominate, Matalo man o manalo ay okay lang, ang importante minsan sa tanang buhay ko may nangyaring na-nominate kaming sabay-sabay na mag-iina at bihirang mangyari iyan. At maikukuwento ko ‘yon sa mga apo ko, ang ma-nominate kami, mapansin ang trabaho namin, malaking bagay na ‘yon. Kung sakaling manalo ka, bonus na iyon,” esplika ng bida sa seryeng The Greatest Love.
Dagdag pa ng batikang aktres. “May kanya-kanya silang estilo ng pag arte, alam kong innate sa kanila ang pag arte, at mahal nila ang craft nila at seryoso sila pareho, andito lang ako para i-guide sila but at the end of the day ‘pag sumigaw ang director ng ‘action’ sila na yan, puso at utak na nila ang susundin nila dyan, out na ako dyan.”
Si Ms. Sylvia ay nominadong Best Drama Supporting Actress para sa Ningning ng ABS-CBN. Kasama niyang nominess sina Carmina Villaroel (Doble Kara, ABS-CBN), Cherie Gil (Dolce Amore, ABS-CBN), Manilyn Reynes (Destiny Rose, GMA 7), Snooky Serna (My Faithful Husband, GMA 7), Sunshine Cruz (Dolce Amore, ABS-CBN), Sunshine Dizon (Little Nanay, ABS-CBN), at Ms. Susan Roces (FPJ’s Ang Probinsyano, ABS-CBN).
Nominado naman si Ria para sa kategoryang Best New Female TV Personality para sa Maalaala Mo Kaya sa episode na Puno Ng Mangga. Si Arjo ay nominated sa Best Drama Supporting Actor para FPJ’s Ang Probinsyano ng ABS-CBN.
ALAM MO NA! – Nonie V. Nicasio
