Lapses sa security ng Cavite mall hostage crisis, aalamin ng PNP-SOSIA

INIIMBESTIGAHAN ng PNP-SOSIA (Supervisory Office for Security and Investigation Agencies) ang posibilidad ng pagkakaroon ng lapses sa seguridad ng SM Dasmariñas sa Cavite kung bakit nakapasok ang patalim ng hostage-taker na nakamatay ng dalawa katao nitong nakaraang Linggo.

Ayon kay PNP-SOSIA Director, Senior Supt. Jose Mario Espino, kwestyonable kung paanong naipuslit ang 12 pulgadang patalim ng hostage-taker na si Carlos Marcos Lacdao na nang-hostage ng 12 katao at nakapatay ng dalawa sa loob ng comfort room ng mall.

Tutukuyin ng PNP-SOSIA kung sino ang partikular na security guard na pumalpak sa pagbabantay sa nabanggit na mall.

Ayon kay Espino, mananagot ang mga security guard sa sandaling mapatunayan may lapses sa kanilang hanay.