HATAW! D'yaryo ng Bayan hatawtabloid.com
MARAMI ang pumupuri sa galing na ipinapamalas lately ng young actor na si Joshua Garcia. Naging bahagi siya ng pelikulang Barcelona na pinagbidahan nina Kathryn Bernardo at Daniel Padilla. Siya rin ang gu-maganap na apo ni Sylvia Sanchez sa TV series na The Greatest Love.
Sa dalawang proyektong nabanggit, parehong positive ang feedback sa kanyang acting. Bukod sa pagiging guwapings, may ibubuga siya sa pag-arte. Katunayan, pati si Ms. Sylvia ay pinuri ang performance ni Joshua sa kanilang afternoon TV series sa Kapamilya Network. “Si Joshua, malayo ang mararating ng batang ito kapag sineryoso at minahal niya itong trabahong ‘to. Natural si Josh, may ibubuga at kumokonek sa akin bilang apo ko siya rito. Mommy La talaga ang tingin niya sa akin dito,” saad ni Ms. Sylvia.
Ano ang reaksiyon dito ni Joshua? “Masaya siyempre, kasi hindi lang ako yung naghirap doon, pati yung mga cast, nahirapan silang i-motivate ako para makuha ko yung character ko na Z. Masaya ako na natutuwa yung mga tao, kasi si Z naman doon, bagets lang e. Bata lang, normal na bata lang, kung anong nangyayari sa mga bata ngayon.”
Sa ngayon, tiyak na mas lalong aabangan ng viewers ang karakter ni Joshua sa The Greatest Love dahil mayroon na siyang love interest sa seryeng ito sa katauhan ng newcomer na si Kira Balinger.
Sa panayam kay Joshua, ipinahayag ng actor na nakasama na niya sa acting workshop si Kira. “Noong dati kasi, magka-workshop na kami pero hindi kami close. Tapos ngayon sa The Greatest Love, nahihiya ako, kasi siyempre magna-nineteen na ako tapos siya, sixteen years old lang, medyo na-awkward-an ako. Pero noong nagka-eksena kami, okay naman iyong bonding namin, nakapag-usap kami. Pero hindi kami ganoon ka-close pa. Siguro pag nagtagal pa yung teleserye, siguro magiging close pa kami.”
Sinabi rin niya ang mga dapat pang abangan sa kanilang TV series. “Unang-una siyempre abangan natin yung magkakasakit na si Gloria, makakalimot na siya. Marami pang mas malulupit na mangyayari na makakalimot siya.”
ALAM MO NA! – Nonie V. Nicasio
