Mag-amang ASG arestado sa Zambo

ZAMBOANGA CITY – Arestado ang mag-ama na hinihinalang mga kasapi ng teroristang Abu Sayyaf group (ASG) at wanted kidnapper, sa operasyon ng Philippine National Police (PNP) kamakalawa sa Brgy. Sta. Barbara sa Zamboanga City.

Kinilala ni Police Regional Office (PRO9) director, Chief Supt. Billy Beltran, ang mag-amang suspek na si Abdul-latip Talanghati Suwaling, alyas Latip Sihata at Tatang, 64, at ang kanyang anak na si Albashrie Talanghati Sata alyas Tagalog at Abu Tarik.

Ang mag-ama ay tubong Brgy. Luuk, Tungkil, lalawigan ng Sulu at pansamantalang naninirahan sa lungsod.

Nabatid na ang amang suspek ay may P5.3 milyon patong sa ulo hinggil sa pagkakasangkot sa Sipadan kidnapping sa isla ng Sabah taon 2000 na sangkot din ang kanyang anak.

Ayon kay Beltran, ang pag-aresto sa mga suspek dakong 9:00 pm ay sa bisa ng warrant of arrest sa kasong kidnapping with serious illegal detention with ransom.