HATAW! D'yaryo ng Bayan hatawtabloid.com
TODO-DEPENSA si NCRPO director, Chirg Supt. Oscar Albayalde sa pagkakapatay sa barangay chairman at anim pang iba sa drug raid sa Quiapo, Maynila.
Ayon sa heneral, ang napatay na si Faiz Macabato, chairman ng Barangay 648, ay nagsisilbing protektor ng illegal drug trade sa lugar.
Aniya, malaking bagay ang isinagawang operasyon sa dahilang huling nangyari ang raid sa Islamic Center, may 30 taon na ang nakalipas.
At may hinala na ilan sa mga wanted ang nagtatago sa lugar.
Kabilang sa naaresto kamakalawa ay isang hinihinalang commander ng BIFF.
Muling nagpaalala si Albayalde sa mga barangay chairman sa Metro Manila na maaaring masuspinde at makasuhan kung hindi makikipagtulungan sa mga awtoridad.
Aniya, mahalaga ang papel na kanilang ginagampanan sa kampanya laban sa krimen lalo na sa droga.
Una nang nagsumite ng 11,900 pangalan o watchlist ang mga barangay chairman sa NCR ngunit tinawag lamang ito ng NCRPO bilang mga basura.
Makaraan ang background check ng inteligence community, umabot sa 41,000 katao ang iniugnay sa ilegal na droga kasama ang self-confessed drug suspects at drug surrenderees.
PAMILYA: HINDI DRUG PUSHER SI CHAIRMAN
MARIING itinanggi ng pamilya ng barangay chairman na napatay sa isinagawang drug raid ng mga pulis sa Islamic Center sa Quiapo, Manila na sangkot ang biktima sa illegal drugs.
Ayon kay Ainah, anak ni Faiz Macabato, barangay chairman ng Brgy. 648, hindi sangkot ang kanilang pamilya sa illegal na droga dahil kung totoo aniya ito ay matagal na sana silang mayaman.
“Wala silang ebidensiya. ‘Di kami nagbebenta [ng droga]. Kung nagbebenta kami sana ang dami na naming ginto. Andami na naming pera,” aniya.
“Bigla po silang (pulis) umakyat dito. Anong kasalanan ng tatay ko? May pruweba ba sila? Di ba wala? Inosente ang tatay ko tapos gaganyanin nila,” umiiyak napahayag ng anak ni Macabato.
Si Macabato ay kabilang sa pito katao na napatay sa pagsalakay ng mga pulis sa Islamic Area sa Quiapo kamakalawa ng umaga.
( LEONARD BASILIO )
