83-anyos ina pinatay ng anak

CAUAYAN CITY, Isabela – Inamin ng isang lalaki na dating mental patient, ang pagpatay sa kanyang sariling ina at itinapon ang bangkay sa ibang lugar.

Ayon kay PO3 Patrick Bumilac, imbestigador ng Diffun Police Station, ang bangkay ng 83-anyos lola na ibinalot ng kumot ay natagpuan sa daan sa San Isidro Paredes, Diffun, Quirino.

May natagpuang ID sa tabi ng lola na naging gabay ng pulisya sa pagsisiyasat sa pagpatay sa kanya.

Ayon kay PO3 Bumilac, pinuntahan nila ang address na Plaridel, Santiago City na nasa ID at nalaman nila na ang anak ng biktimang si Regina Gabot, ang pumatay sa kanya.

Inamin ng suspek na si Nestorio Gabot, sinakal niya ang ina sa pamamagitan ng sinturon. Nang malagutan ng hininga ang ina ay ibinalot ng kumot, isinakay sa tricycle at itinapon sa tabi ng daan sa Diffun, Quirino.

Habang sinabi ng mga kapatid ni Nestorio, galing na siya sa mental hospital sa Lunsod ng Tuguegarao.

Posible anilang sinumpong ang suspek dahil hindi nakainom ng maintenance medicine.

Dinala na ang suspek ng kanyang mga kapatid sa mental hospital makaraan aminin ang pagpatay sa kanilang ina.