Ex ng 2 top drug lords Itinumba sa Cebu

CEBU CITY – Pinagbabaril nitong Biyernes ng tatlong hindi nakilalang suspek ang dating misis ng suspected drug lord at puganteng si Kerwin Espinosa, na naging live-in partner din ng isa pang napatay na drug lord na si Jeffrey “Jaguar” Diaz sa Las Piñas City.

Sa inisyal na imbestigasyon ng pulisya, si Annalou Llaguno, 30, ay nakaangkas sa motorsiklo ng kanyang partner,  nang tatlong lalaking lulan din ng motorsiklo ang sumunod sa kanila at dalawang beses na binaril sa ulo ang biktima.

Narekober sa lugar ng insidente ang isang .45-caliber pistol ngunit hindi pa batid ng mga awtoridad ang pagkakilanlan ng mga suspek.

Ang biktima ay nagbebenta ng mga alahas, ngunit masusing iniimbestigahan ng mga awtoridad ang insidente kung ito ay may kaugnayan sa droga dahil si Llaguno ay dating karelasyon ni Cebu’s top drug lord Jeffrey “Jaguar” Diaz, bukod sa pagiging dating misis ni Espinosa.

Si Diaz ay namatay sa shootout sa Las Piñas noong Hunyo, habang si Espinosa ay nagtatago.