Armas ng ASG narekober sa Basilan

ZAMBOANGA CITY – Narekober ng militar ang  matataas na kalibre ng mga baril, bala at mga eksplosibo sa kamakalawa sa Brgy. Katipunan, Tuburan sa lalawigan ng Basilan.

Ayon sa Western Mindanao Command (WestMinCom), pag-aari ng teroristang Abu Sayyaf group (ASG) ang nakuhang mga kagamitan.

Kabilang sa mga narekober ang isang unit ng M14 rifle na may walong magazines at 39 bala; M16 rifle at dalawang long magazine, walong short magazine na may walong bala; apat  rifle grenade, binocular, dalawang bandolier, pair combat boots at isang hammock.

Nagsasagawa ng patrolya ang mga sundalo ng 7th Scout Ranger Company sa pangunguna ni Lt. Serrano kasama ang tropa ng 14th Scout Ranger Company sa pangunguna rin ni Cpl. Francisco, nang mamataan nila ang ilang kahina-hinalang lalaki sa hindi kalayuan.

Pinaputukan ang mga sundalo ng mga bandido saka tumakbo sa karatig na kabahayan at tumakas palayo.

Nagsagawa ng pursuit operation ang mga sundalo laban sa mga tumakas na Abu Sayyaf at narekober ang naiwan nilang mga kagamitan.

Patuloy na tinutugis ng mga sundalo ang mga tumakas na ASG.